د سږني کال د (۶۵۲) تنو حجاج کرامو د معلمینو روزنیز سیمینار په بریالیتوب سره پای ته ورسېده.
۲۱ شوال ۱۴۴۴ هـ ق (۲۱ ثور ۱۴۰۲ هـ ش)
د روان هجري قمري کال د (۶۵۲) تنو حجاج کرامو د معلمینو روزنیز سیمینار، چې په دریوو پړاونو کې ددې وزارت له لوري په مرکزي زون د حاجیانو په مجتمع کې پیل شوې وه، نن د ارشاد، حج او اوقافو وزیر شیخ الحدیث دکتور مولوي نور محمد ثاقب په ګډون پای ته ورسېده.
په همدې تړاو جوړې شوې غونډه کې د یاد وزارت محترم وزیر او ددې وزارت مرکزي ریاستونو یو شمیر رئیسانو ګډون درلود.
غونډه د قرآن کریم د څو مبارکو آیتونو په تلاوت سره پیل شوه، ورپسې شیخ الحدیث دکتور مولوي نور محمد ثاقب په خپله قېمتي وینا کې د علم او علماوو پر فضیلت، د حجاجو پر خدمت او د صبر او خاکساري پر اهميت هر اړخیزه رڼا واچوله.
ښاعلي ثاقب زیاته کړه، چې هر معلم سره به (۴۵) تنه حاجیان وي نو تاسو باید له دوی سره معرفت حاصل کړئاو دوی ته د حج مناسک او لارښوونې ور زده کړئ او تاسو باید له دوی سره ډیر زیار او کوښښ اوباسۍ.
په همدې تړاو ښاغلي ثاقب وويل: موږ او تاسو باید په ګډه همکارۍ سره د حاجیانو خدمت وکړو او په ښه ډول سره د حج پروسه مدیریت کړو او په ښه نظم سره افغان حاجیان له هېواد څخه سعودي عربستان ته انتقال او بیرته په ښه ډول راستانه کړو او د یادو حجاج کرامو د تغذیي، ترانسپورټ او روغتیا په برخه کې جدي پاملرنه وکړو، چې ترڅو افغان حاجیان د حج فریضه او دیني مناسک په یو ارامه او ښه فضاء کې اداء کړي.
د غونډې په پای کې محترم ثاقب ټولو معلمینو ته په خپلو ور سپارل شویو دندو او چارو کې د سر لوړي او بریالیتوب دعاء ترڅنګ ددې وزارت له لوري (د حج او عمرې د مناسکو لارښود) کتاب چاپ په محترمو معلمینو ووېشل شو.
