د ارشاد، حج او اوقافو وزارت لخوا په ټول هېواد کې د حاجیانو د معلمنیو ارزیابي او آزموینې بهیر پیل شو

۷ رمضان المبارک ۱۴۴۴ هـ ق (۹ حمل ۱۴۰۲ هـ ش)

نن: د ارشاد، حج او اوقافو وزارت لخوا په مرکز د حاجیانو په مجتمع کې او په ولایاتو کې ددې وزارت په ریاستونو کې د حاجیانو د معلمینو ارزیابي او آزموینې بهیر په رسمي ډول پیل شو.

د ارشاد، حج او اوقافو وزارت رهبري د راتلونکي کال د حج په پروسه کې د اسانتیاوو او روڼتیا په موخه د یوې آزادی سیالۍ له لارې هغه علماء کرام چې دیني علومو (لویې دورې) څخه د فراغت معتبر سند ولري، سیرت او صورت یې په شریعت برابر وي او د حجاجو د خدمت کولو توانايي ولري د آزموینې تر بریالي کېدو وروسته به د حجاجو کرامو د معلم په حیث په دندو وګمارل شي.

په مرکز کې د شپږ کسیزه هئیت مسؤل او د مقام دفتر رئیس قاري عبدالصبور فاروق وایی: چې په دې پروسه کې (۱۲۰۰۰) تنو څخه زیات شیوخو او علماء کرامو نوم لیکنه کړې وه، چې (۲۱۹۳) تنه یې یواځې د کابل ښار د نواحیو څخه دی.

نوموړي زیاته کړه، چې په مرکز کې هره ورځ له (۲۰۰) تنو څخه زیات شیوخو او علماء کرامو ارزیابي او آزموینه اخیستل کیږي او دا لړی دوام لری.

د یادونې وړ ده چې د آزموینې د روڼتیا او شفافیت په تړاو د ارشاد، حج او اوقافو وزارت لخوا په مرکز کې شپږ کسیزه هئیت او په ولایتونو کې ددې وزارت درې کسیزه هئیت، د ولایت مقام مسؤل، د علماوو شورا مسؤل او ددې ولایت د ارشاد، حج او او قافو رئیس په شتون کې له هغو شیوخو او علماء کرامو څخه آزموینه واخلی چې مخکې يې نوم لیکنه کړې وه