د ارشاد، حج او اوقافو وزیر د منی او عرفات له خیمو څخه لیدنه وکړه
۶ ذوالحجة ۱۴۴۴ هـ ق ( ۳ د سرطان ۱۴۰۲ هـ ش)
د ارشاد، حج او اوقافو وزیر او د افغانستان د حج بعثې عمومي رئیس شیخ الحدیث دکتور مولوي نورمحمد ثاقب په داسې حال کې چې د مکې مکرمې د حج کاري کمېټو مسؤولینو يې ملتیا کوله؛ د منی او عرفات له خیمو څخه لیدنه وکړه.
د نوموړي له دې لیدنې څخه هدف افغان حاجیانو ته په مشاعرو کې د آسانتیاوو برابرول او پروخت خدمتونه وړاندې کول یاد کړل.
د ارشاد، حج او اوقافو وزیر په منی او عرفات کې د افغان حاجيانو د اوسېدو ځایونو، د پخلنځي، روغتیایی کلینیکونو او د ټرانسپورټ له تمځایونه څخه لیدنه وکړه.
نوموړي په خپلو خبرو کې ویل: په منی او عرفات کې کومې خیمې چې د افغان حاجیانو لپاره ځانګړې شوي په مجهز ډول سمبال او د تېرو کلونو په پرتله ډېرې مناسبې دي؛ په منی کې جمرات ته او په عرفات کې جبل الرحمة ته نږدې او د ایرکنډیشنونو په درلودلو سره په نویو غالیو او توشکو پوښل شوي دي.
همدا راز ددې تر څنګ يې مسوؤلینو ته لارښونه وکړه، چې حاجیانو ته له شته امکاناتو څخه په استفادې د اسانتیاوو د برابرولو په برخه کې له هر ډول هڅو څخه کار واخلی ځکه چې حاجیان ضیوف الرحمن دي، نو موږ او تاسو باید د اللهﷻ د میلمنو خدمت وکړو.
په پای کې د یو شمېر کمېټو مسؤولینو افغان حاجیانو ته د غوره خدماتو وړاندې کولو په تړاو خپل پوره چمتووالۍ وښود.
