په مدینه منوره کې د افغان حاجیانو د تسکین لړۍ په منظم ډول روانه ده
یکشنبه ۶ ذوالقعدة ۱۴۴۶هـ ق مطابق ۱۴ ثور ۱۴۰۴هـ ش
د افغان حاجیانو په عمارو کې د ځای په ځای کیدو «تسکین » لړۍ په منظم او منسجم ډول روانه ده چې نن د حج بعثې د تسکین کمېټې د کابل، لوګر او خوست ولایتونو حاجیان د نبوي حرم سره نږدې، د برج المختارة عماره په نوم یو مناسب او عصري هستوګنځي کې ځای پر ځای کړل.
په دغو عماروکې د عصر سره سمې ټولې لازمې اسانتیاوې موجودي دی او حاجیانو ته پکښې مناسب خدمتونه وړاندې کېږي.
همدارنګه د افغان حاجیانو لپاره په دغو عمارو کې د خوړو (ډوډۍ) سهولت هم برابر شوی دی، چې درې وخته خواړه ورته دټاکلي او منظم مهالویش لمخې ورکول کېږي.
همدا راز په مدینه منوره کې د حج بعثه د وزارت سره په همغږۍ د حاجیانو لپاره د سکونت، تغذیې، ټرانسپورټ او روغتیا اړوند ټول خدمات د کیفیت او معیاري مطابق برابر کړي، څو افغان حاجیان وکولای شي خپل دغه مبارک د حج سفر په پوره اطمینان او روحاني فضا کې ترسره کړي.
د یادونې وړه ده چې د آریانا افغان او کام ایر هوایي شرکتونو له لوري تر دې دمه له مرکز او شمال زونونو څخه د (۲۵) پروازونو په ترڅ کې (۷۹۵۴) تنو څخه زیات افغان حاجیان مدینې منورې ته انتقال شوي دي او په راتکونکي کې به هم دا لړۍ دوام ولري.
