د هېواد دیني عالمانو د یوې پراخه غونډې په ترڅ د سولې او اوربند غوښتنه وکړه.
چهارشنبه، ۱۶ چنګاښ ۱۴۰۰
کابل: نن د هېواد ګڼ شمېر دیني عالمانو د یوې پراخه غونډې په ترڅ کې د سولې او په افغانستان کې د سولې اعلان تر عنوان لاندې د افغانستان او پاکستان د علماوو د ګډ کنفرانس چې د رابطةالعالم الاسلامي په مشرۍ او د سعودي عربستان شاهي دولت په همکارۍ جوړ شوی و، خپل کلک ملاتړ اعلان کړ.
په دغه غونډه کې د کابل ولایت د ارشاد، حج او اوقافو رئیس سید محمد شیرزادي، د کابل والي محمد یعقوب حیدري، د لوګر ولایت د علماؤ شورا رئیس اسد الله نوري، د مرکز زون د علماؤ شورا رئیس، د ختیځ زون د علماؤ شورا رئیس او د هیواد ګڼ شمېر نورو مخورو دیني علماوو ګډون کړی و.
د غونډې په پیل کې د کابل ولایت د ارشاد، حج او اوقافو رئیس سید محمد شیرزادي په افغانستان کې روانه جګړه او ورور وژنه ناروا وبلله او د جګړې له ښکېلو اړخونو یې وغوښتل، چې نور جګړه ودرروي. او د یو سوکاله افغانستان لپاره مټې راونغاړي.
ورپسي د کابل والي ښاغلي محمد یعقوب حیدري، د علماؤ شورا رئیسانو او د هیواد جیدو علماء کرامو ویناوې وکړي او ټولو په یو غږ سره په افغانستان کې روانه جګړه ناروا او مسلمان وژنه وبلله.
ویناوالو په سعودي عربستان کې، د رابطة العالم الاسلامي په مشرۍ د افغانستان او پاکستان د علماوو د جوړ شوي ګډ کنفرانس او د کنفرانس د پرېکړه لیک څخه خپل کلک ملاتړ اعلان کړ.
