د ارشاد، حج او اوقافو وزارت لخوا د معلمینو لپاره علمي او عملي روزنیز سیمینار پیل شو
نن: د ارشاد، حج او اوقافو وزارت لخوا په مرکزي زون د حاجیانو په مجتمع کې د حاجیانو د معلمینو لپاره عملي او علمي سیمینار په رسمي ډول پیل شو.
چې په همدې تړاو جوړه شوې غونډه کې د ارشاد، حج او اوقافو وزارت د عرفان او دیني ځایونو د چارو تنظیم معین شیخ عزیز الرحمن منصور، ددې وزارت مرکزي رئیسانو او یو شمیر د حاجیانو معلمینو ګډون درلود.
غونډه د قرآن عظیم الشان څو مبارکو آیتونو په تلاوت سره پیل شوه، ورپسې د یاد وزارت د عرفان او دیني ځایونو د چارو تنظیم مرستیال شیخ عزیز الرحمن منصور د قرآن کریم او د نبوي احادیثو په رڼا کې د یو ښه معلم صفتونو په اړه خبرې وکړې او زیاته یې کړه، چې د حاجیانو معلمین د حج مسائلو تر څنګ د دې له فضایلو څخه هم خبر دی. نو دا مسائل په پوره حوصلې سره د دې قدرمنو حاجیانو ته هم تدریس کړې.
همدا راز ښاغلي منصور وویل: د حاجیانو معلمي یو لوی او ملي مسؤلیت دي دا چې تاسو باید د حج په ګنګره کې د غیور ملت استازی اوسئ او د اسلامي نظام او اسلامي امارت لپاره د ښه اخلاقو سره ښه نوم او بریا راوړئ.
په ورته وخت کې، د دیني تعلیماتو او تدریب ائمه رئیس مولوي محمد اشرف حقاني وویل: نن د (میدان وردک، کابل، پنجشیر، پروان، کاپیسا، دایکندی) ولایتونو د حجاج کرامو معلمینو ته د شیوخو لخوا د خپل مسؤلیت او دندې لپاره د غوره چمتووالي په تړاو تر یوې اونۍ پوري زده کړی ورکول کیږي.
ښاغلي حقاني زیاته کړه، چې د یاد سیمینار موخه دا ده، چې د حج له پروسه سره د حاجیانو معلمینو بلدتیا، د هېواد دننه او په سعودي عربستان کې خپلې دندې په ښه ډول ورپیژندل او همدا راز په ولایتونو او ولسواليو کې د تلونکو حاجیانو لپاره درسی حلقي او په سعودی عربستان کې په منظم ډول حجاج کرامو ته ددینی حلقو جوړول شامل دی .
د یادونې وړ ده چې د وزارت رهبري د راتلونکي کال د حج په پروسه کې د اسانتیاوو او روڼتیا په موخه د یوې آزادی سیالۍ له لارې هغه علماء کرام چې تر آزموینې وروسته بریالی شوی دی د حجاجو کرامو د معلم په حیث وټاکل شول
