د ارشاد،حج او اوقافو وزارت ولایتي رئیسانو او کارمندانو ته د ظرفیت لوړونې په موخه سیمینار پیل کړ
۴ جمادي الأولی ۱۴۴۵ هـ ق (۲۷ عقرب ۱۴۰۲ هـ ش)
نن د ارشاد، حج او اوقافو وزارت په پلازمینه کابل کې د دې وزارت اړوند ټولو ولایتي ریاستونو رئیسانو او کارمندانو ته په ارشادي، حج، اوقافي، اداري، ظرفیت لوړولو او په ستونزمنو حالتو کې د پریکړو کولو برخه کې اوونیز سیمینار پیل کړ.
د یاد سیمینار د پرانیستي په غونډه کې د ارشاد، حج او اوقافو وزارت مسلکي مرستیال شیخ الحدیث مولوي زرمحمد حقاني، د چارو ادارې د نظارت او پالیسۍ مرستیال مولوي عبدالولي حقاني او ددې وزارت مرکزي او ولایتي رئیسانو او کارمندانو ګډون درلود.
غونډه د قرآن عظیم الشان د څو مبارکو آیتونو په تلاوت پيل شوه، ورپسې د چارو ادارې د نظارت او پالیسۍ مرستیال مولوي عبدالولي حقاني د خپلو خبرو په ترڅ کې دغه سیمینار د اداري کارونو د ښه ترسره کولو او د خپلو مسؤلیتونو د پيژندلو په برخه کې خورا مهم وباله او زیاته یې کړه چې د ارشاد، حج او اوقافو وزارت له لوري د داسي سیمنار پیلدل بې ساری ګام دی.
د غونډې په لړ کې د ارشاد،حج او اوقافو وزارت مسلکي مرستیال خبرې وکړې، نوموړي وویل: یاد سیمینار څلور اساسي برخې لري چې لومړی برخه یې ارشادي برخه ده په دې برخه کې د جوماتونو او ارشادي برخو په اهمیت، اغېزو او اړتیاوو خبرې کېږي، دویم د حج په برخه کې د هېواد دننه او په سعودي عربستان کې افغان حاجیانو ته د غوره خدمتونو وړاندې کولو په تړاو خبرې کېږي، دریم د اوقافي ملکیتونو نظارت او د عوایدو راټولولو په موضوعاتو خبرې کېږي. څلورمه برخه یې د مالي او اداري برخو په موضوعاتو به هم خبرې وشي، د دې اساسي برخو سربیره به د کارمندانو په ظرفیت لوړونه، او په کاري برخه کې د دوی د شخصي تجربو څخه د غوره استفادې په میتودونو هم له دوی سره کار وشي.
