د هېواد له لویدیځ زون څخه د افغان حاجیانو لومړۍ الوتنه ترسره شوه
۸ ذوالقعدا ۱۴۴۴ هـ ق (۷ جوزا ۱۴۰۲ هـ ش) سعودي عربستان ته د افغان حاجيانو د لېږد بهير په دوام نن سهار درې بجې د خواجه عبدالله انصاري هوايي ډګر څخه لومړۍ الوتنه ترسره وشوه. په همدې تړاو د حاحیانو لومړۍ الوتنې د تودیعي په غونډه کې چې د هرات د هوايي ډګر په ترمینل کې جوړه شوې وه، ددې ولایت والي، یو شمېر مسؤلینو، د ادارو رئیسانو او د ارشاد، حج او اوقافو رئیس نجیب الله کروخي ګډون درلود. په پیل کې د ارشاد، حج او اوقافو رئیس مولوي نجیب الله کروخي د افغانستان اسلامي امارت او د ارشاد، حج او اوقافو وزارت له لوري په حرمینو شریفینو کې افغان حاجیانو ته د غوره خدماتو او اسانتیاوو برابرولو په تړاو هر اړخیز معلومات وړاندې کړل او تلونکو حاجیانو ته یې د ښه سفر او مبرور حج دعا وکړه. ويل شوي دي چې د لویدیځ زون په لومړۍ الوتنه کې له هرات او غور ولایتونو څخه (۳۴۶) تنه حاجيان د مدينې منورې هوايي ډګر ته انتقال شی.
