له مکې مکرمې څخه د افغان حاجیانو وروستۍ پرواز نن هېواد ته ترسره شو
دوشنبه ۴محرم الحرام ۱۴۴۷ هـ ق مطابق ۹ سرطان ۱۴۰۴ هـ ش
مکه مکرمه – هغه افغان حاجیان چې د هېواد له څلورو پروازي زونونو څخه سعودي عربستان ته لېږدول شوي وو، د حج فریضې تر اداء کولو وروسته نن له مکې مکرمې څخه د افغان حاجیانو وروستي پروازونه د جدې ښار د ملک عبدالعزیز نړیوال هوايي ډګر څخه د کابل نړیوال هوایي ډګر او مولانا جلال الدین محمد بلخی هوایي ډګر پر لور ترسره شول.
په ۱۴۴۶ هـ ق کال کې د ارشاد، حج او اوقافو وزارت له لوري د (۹۷) پروازونو په ترڅ کې(۳۰) زره تنه افغان حاجیان حرمینو شریفینو ته را انتقال شوي ول، چې له دې جملې (۱۵۰۰۰)تنه یې په لومړیو پروازونو کې مدینې منورې ته ولېږدول شول او پاتې نور (۱۵۰۰۰) تنه يې د جدې هوایي ډګر له لارې مکې مکرمې ته منتقل شول او د حج مناسکو له اداء کولو وروسته هغه حاجیان چې د جدې له لارې مکې مکرمې ته راغلي ول مدینې منورې ته ولېږدول شول او هغه حاجیان چې مدینې منورې ته راغلې ول، د مکې مکرمې له لارې هېواد ته ستانه شول.
د یادونې وړ ده چې له مکې مکرمې څخه هېواد ته د افغان حاجیانو د لېږد بهیر بشپړ شوو، خو له مدینې منورې څخه هېواد ته د حاجیانو ستنېدونکي پروازونه لا هم په عادي ډول دوام لري.
