په مدینه منوره کې د افغان حاجیانو لپاره ۲۴ ساعته روغتیايي خدمات وړاندې کیږي
۶ ذوالقعدة ۱۴۴۴ هـ ق (۵ جوزا ۱۴۰۲ هـ ش) د مدینې منورې د حج بعثې روغتیا کمېټي له ډاکټرانو او روغتیايي پرسونل سره په همغږۍ شپه او ورځ افغان حاجیانو ته د ۲۴ ساعته روغتیايي خدمتونو وړاندې کولو لپاره هڅې کوي. مدینې منورې ته د حاجیانو د راتګ سره سم، یاده کمېټه د منظمو تدابیرو او پلانونو په نیولو سره خپل خدمات پیل کړي دي او د تجربه لرونکو ډاکټرانو او د اړتیا وړ درملو او کلینیکونو په درلودلو سره د حاجیانو د روغتیا او درملنې ته جدي پاملرنه کوي. د يادې کمېټې مسؤل محترم ډاکټر صدرالدين په يوه مرکه کې وويل، چې د دغې کمیټې د وقایه او درملنې په برخه کې حاجیانو د اړتیاوو تشخیص له مخې، د هیواد حاجیانو ته د روغتیایي خدمتونو وړاندې کول په دریو برخو ویشلي دي: ۱: د دې کمېټې ګرځنده ټیم د حاجیانو عمارو او خونو ته ځي او د ناروغانو درملنه کوي. ۲: د سرپا کلینیکونه (OPD) پرانیستل شوي او حاجیان هلته د درملنې لپاره ورځي. ۳: که زموږ د حاجي روغتیايي حالت د ډاډ وړ نه وي، ناروغ په عاجله توګه د سعودي روغتونونو ته د درملنې لپاره استول کیږي. نوموړي زیاته کړه، چې مدینې منورې ته د حاجیانو د لېږد له پیل راهیسې، د سیار روغتیایي ټیم له خوا د (۳۵۰) کسانو درملنه شوې، د (۴۰۰) کسانو درملنه په سراپا کلینک کې شوې او (۷۰ ) تنه حاجیان د درملنې لپاره د سعودي روغتونونو ته معرفي شوي دي
