په مکه مکرمه کې د ارشاد، حج او اوقافو وزیر ترمشرۍ لاندې د حج بعثې ځانګړې اداري غونډه ترسره شوه
یکشنبه ۴ ذوالحجة الحرام ۱۴۴۶ هـ ق مطابق ۱۱ جوزا ۱۴۰۴ هـ ش
د افغانستان اسلامي امارت د ارشاد، حج او اوقافو وزیر او په سعودي عربستان کې د حج بعثې عمومي رئیس شیخ الحدیث سرمحقق دکتور نور محمد ثاقب تر مشرۍ لاندې د حج کاري کمېټو له مسؤولینو سره غونډه ترسره کړه.
غونډه د قران عظیم الشان د څو مبارکو آیتونو په تلاوت سره پیل شوه، ورپسې د ارشاد، حج او اوقافو وزیر او د حج بعثې عمومي رئیس په مکه مکرمه کې د پوره دېرش زره حاجیانو د ځای په ځای کیدو او دوی ته د مناسکو د زده کړې د لړۍ له جریان څخه اطمینان حاصل کړ، همداشان د ټولو کاري کمیټو ګزارشات او پلانونه یې واوریدل او د شویو قرادادونو لمخې یې ټول کارونه مثبت وارزول، همداشان یې مشاعرو ته د حاجیانو د انتقال لپاره اړونده مسوؤلینو ته لازمې لارښوونې او سپارښتنې وکړي.
ښاغلي ثاقب وویل، د حج د مراسمو پيل ته يواځې څو ورځې پاتې دي او د کاري کمېټو مسؤولین باید خپلو دندو ته په جدي توگه پاملرنه وکړي او دوی د حاجیانو له معلمینو او د مکاتبو له استازو سره په همغږۍ مشاعرو ته د حاجیانو د انتقال لپاره منظم ټرانسپورټ، د حج مناسکو تدریس، درې وخته خواړه او روغتیایې خدمتونو د وړاندې کولو لپاره پوره چمتوالي ولري.
د غونډې په جریان کې د کاري کمیټو مسوؤلینو د محترم وزیر صاحب له ګټورو لارښوونو او سپارښتونو څخه مننه وکړه او مشاعرو ته د حاجیانو د انتقال په برخه کې د ټرانسپورټ، تغذیې، مناسکو، مفقودینو، نشراتو، بهرنيو اړيکو او روغتيايي کمېټو مسؤولینو د بشپړې چمتوالي او همغږۍ په اړه اطمینان ورکړ، تر څو افغان حاجیان وکولای شي د حج مراسم او مناسک په ارامه او ډاډ منه فضاء کې ترسره کړي.
غونډه د عائیې په ویلو سره پای ته ورسیده
