په مکه مکرمه کې د مناسکو کمېټې د افغان حاجیانو د خدمت او همغږۍ په موخه له معلمینو سره غونډه ترسره کړه
شنبه ۲۶ ذوالقعدة الحرام ۱۴۴۶ هـ ق مطابق ۳ جوزا ۱۴۰۴ هـ ش
په مکه مکرمه کې د مناسکو کمېټې مسؤولینو د حاجیانو له معلمینو سره غونډه ترسره کړه، په دې غونډه کې د حج په مبارکو ورځو کې د حاجیانو خدمت، مشاعرو ته د حاجیانو انتقال، د حج د مناسکو اداء کولو، د مسوؤلینو ترمینځ همغږي او د ارشادي موضوعاتو په تړاو بحث وشو.
د غونډې ګډونوالو د حاجیانو د ښه تنظیم، په خدماتو کې همغږۍ او د معلمینو د رول د لا پیاوړتیا په اړه خپل نظریات او سپارښتنې شریکې کړې، ترڅو افغان حاجیان وکولای شي د حج مناسک په اسانه او منظمه توګه ترسره کړي.
همداراز، په غونډه کې ټینګار وشو چې د حج په مبارکو ورځو کې مشاعرو ته د حاجیانو منظم انتقال، په منیٰ او عرفات کې مناسب خواړو برابرول او د ټرانسپورټ چمتو کول هغه برخې دي چې معلمین او د بعثې ټول غړي پکې مهم رول لري له همدې امله معلمین باید د بعثې له مسؤولینو سره په همغږۍ کار وکړي ترڅو افغان حاجیانو ته د حج مناسکو پر مهال غوره خدمتونه وړاندې شي.
