د ارشاد، حج او اوقافو وزیر په کابل کې د ایران د اسلامي جمهوریت له سفیر سره وکتل
یکشنبه ۱۲ غويي ۱۴۰۰
نن د ارشاد، حج او اوقافو وزیر محمد قاسم حلیمي په خپل کاري دفتر کې د ایران اسلامي جمهوریت له سفیر ښاغلي ډاکټر بهادر امینیان سره د دواړه هېوادونو د مذهبي او فرهنګي اړیکو د پیاوړتیا په موخه ولیدل.
په پیل کې د ارشاد، حج او اوقافو وزیر محمد قاسم حليمي د دواړو ګاونډیو هېوادونو په دیني، مذهبي او کلتوري برخه خبرې وکړې او زیاته یې کړه، چې موږ غواړو د اسلامي نړۍ له ټولو هېوادونو په ځانګړي ډول له ګاونډیو هېوادونو سره په دیني، مذهبي او کلتوري برخه کې پراخې او نږدې اړیکې ولرو.
نوموړي زیاته کړه: د وسطیت او اعتدال او همدارنګه د افکارو د تبادلې په موخه باید د دواړو هېوادونو د علماوو ترمنځ لوی علمي او څېړنیز سمینارونه جوړ شي، همداشان د دواړو هېوادونو د علماوو تر منځ ښه همغږي رامنځته شي.
ښاغلي حلیمي زیاته کړه: دواړه مسلمان وروڼه او دوست هېوداونه د حج او عمرې په برخه کې باید خپل تجارب یو له بل سره شریک کړي.
ورپسې په کابل کې د ایران اسلامي جمهوریت سفیر ښاغلي ډاکټر بهادر امینیان خبرې وکړې. نوموړي وویل: افغانستان او ایران دواړه نږدې ګاونډي هېوادونه دي، چې ډېر نږدې مذهبي او کلتوري مشترکات لرو چې د دغو مشترکاتو د تقویه لپاره باید کډ کار وکړو
نوموړي زیاته کړه: ایران په افغانستان کې د یوې تلپاتې سولې غوښتونکی دی او د ایران علماء هم چمتو دي، چې له افغان علماوو سره په دې برخه کې هر راز همکارې وکړي
