د ارشاد، حج او اوقافو وزارت څلورو ریاستونو ته نوي رئیسان معرفې شول.
دوشنبه: ۱۴۴۳/۶/۲۷- ۱۴۰۰/۱۱/۱۱
د ارشاد، حج او اوقافو وزارت د رهبري له لوري د دې وزارت څلورو ریاستونو ته نوي رئیسان معرفې او په کار یې پیل وکړ.
نوي رئیسان هر یو مولوي عبدالصمد عمري د څارنې او ارزونې ریاست د سرپرست رئیس، قاري عبدالصبور فاروق د اعتدال ریاست د سرپرست رئیس، مولوي محمد افضل کرامت اخنذاده د عمرې او زیارت ریاست د سرپرست رئیس او مولوي عبدالباقي عاصم د اوقافو ریاست د مسلکي آمر په توګه وټاکل شول.
په دغه غونډه کې د ارشاد، حج او اوقافو وزارت د اداري او مالي ریاست سرپرست رئیس مولوي عبدالولي خبرې وکړې. نوموړي وویل: چې په ادارو کې ادلون بدلون یو اصل دی، او دغه بدلونونه د لا ښه خدمت او غوره چوپړتیاوو په موخه ترسره کېږي. هغه زیاته کړه، چې د ارشاد، حج او او قافو وزارت به د افغانستان د اسلامي امارت اساسي او سپېڅلو اهدافو ته د رسېدو او هېوادوالو ته د غوره خدمت په لاره کې هېڅ راز هلې ځلې او همکارۍ ونه سپموي.
