په مکه مکرمه کې د حج مناسکو د اداء کولو وروسته د ارشاد، حج او اوقافو وزیر تر مشرۍ لاندې د حج پروسې د ارزونې په تړاو غونډه ترسره شوه
پنجشنبه ۱۴ ذوالحجة الحرام ۱۴۴۵ هـ ق (۳۱ جوزا ۱۴۰۳ هـ ش)
سعودي عربستان، مکه معظمه: د ارشاد، حج او اوقافو وزیر او په سعودي عربستان کې د حج بعثې عمومي رئیس شیخ الحدیث سرمحقق قضاوتپوه دکتور مفتي نور محمد ثاقب تر مشرۍ لاندې د حج مناسکو تر اداء کولو وروسته د افغانستان د حج قنسلۍ رئیس او منسوبینو، د ټولو کمېټو مسؤلینو، مرکزي او ولایتي رئیسانو په شتون کې د مکې معظمې د حج بعثې په مرکزي دفتر کې غونډه ترسره شوه.
غونډه د قرآن عظیم الشان د څو مبارکو آیتونو په تلاوت سره پیل شوه، ورپسې د ارشاد، حج او اوقافو وزیر د غونډې د پیل وینا وکړه او زیاته یې کړه: د شکر ځای دی چې د کاري کمېټو د مسؤلینو او اعضاؤ په مخلصانه هلو ځلو د حج مناسکو پروسه له کومې لوې ستونزې پرته په بریالیتوب سره پای ته ورسېده.
ښاغلي ثاقب د حج پروسې په ټولو اړخونو رڼا واچوله او د کاري کمېټو له مسؤلینو څخه یې د ترسره شوو کارونو راپورونه واورېدل او له هغو څخه یې د قوت د نقطو د لانور قوي کولو او د موجودو ستونزو او مشکلاتو په رسمي ډول د سعودي عربستان د حج او عمرې وزارت او خدماتي مؤسسو سره د شریکولو هدایت وکړ تر څو په راتلونکي حج کې ورته پام لرنه وشي.
د ارشاد، حج او اوقافو وزیر د حاجیانو د لېږد او هېواد ته د بیرته ستنیدو پر بهیر خبرې وکړې چې د اړونده کمېټو مسؤلينو او کارکونکو بشپړ چمتوالی وښود او زياته يې کړه چې په ټول توان سره به په دغه پروسه کې خپل خدمت ترسره کوي.
د غونډې په پای کې د راتلونکي حج لپاره د لازیاتو اسانتیاوو او غوره خدمتونو د وړاندې کولو په تړاو مفصلې خبرې وشوې.
