د تسلیت پیغام
په ډېرې خواشینۍ سره مو خبر ترلاسه کړ، چې د هېواد د پرمختګ او د بیان د ازادۍ دښمنانو د خپلو تېرو او نه بخښونکو جنایتونو پر دوام، پرون مازدیګر د جلال اباد ښار په لومړۍ ناحیه کې په یوه تروریستي برید کې د ننګرهار ولایت د انعکاس راډیو تلویزیون درې ښځینه کارکوونکي شهیدانې کړې.
اِنَّالِلَه وَاِنَّااِلَيْهِ رَاجِعُوْنَ
د ارشاد، حج او اوقافو وزارت رهبري هیئت د دغې تروریستي پېښې د سخت غندلو تر څنګ پر بې ګناه هېوادوالو په ځانګړي ډول پر ښځو (د ټولنې پر مظلوم قشر) تروریستي بریدونه د اسلام مبین دین د ارشاداتو، افغاني کلتور، د سولې روحیې خلاف، د بیان پر ازادۍ او ولسواکۍ برید بولي.
د ارشاد، حج او اوقافو وزارت رهبري هیئت د الله تعالی له دربار څخه د پېښې شهیدانو ته فردس جنت، کورنیو، دوستانو، خواخوږو، د ننګرهار ولایت مقام او د هېواد د رسنیو کورنۍ ته د خپلې خواخوږۍ او همدردۍ ژور مراتب وړاندې کوي.
