د ارشاد، حج او اوقافو وزیر د هرات ولایت له علماوو سره وکتل
یکشنبه ١٥ وري ١٤٠٠
نن د ارشاد، حج او اوقافو وزیر محمد قاسم حلیمي د یو پلاوي په مشرۍ هرات ولایت ته ورسېده او د هغه ولایت له علماوو سره یې د ولایت مقام په تالار کې وکتل
په دغه کتنه کې محمد قاسم حلیمي د هرات ولایت د علماوو نظریات او وړاندیزونه واورېدل.
د هرات ولایت د علماوو په استازیتوب دوو تنو علماوو خبرې وکړې او د هرات ولایت د زیاتو جوماتونو د رسمي کېدو تر څنګ یې د علماوو د امنیت د خوندیتوب، علماوو ته د تحصیلي بورسونو او د ظرفیت د لوړاوي په موخه د نړیوالو سیمینارونو غوښتنه وکړه. دغو علماوو په خپلو خبرو کې وویل: د لویدیځ زون په ځانګړي ډول د هرات ولایت علماء تل د ارشاد، حج او اوقافو وزارت او خپل نظام تر څنګ ولاړ دي او ملاتړ یې کوي.
ورپسې د ارشاد، حج او اوقافو وزیر محمد قاسم حلیمي د هرات ولایت د علماوو نظریات او وړاندیزونه واورېدل او په برخه کې یې د همکارۍ ژمنه ورکړه. ښاغلي حلیمي د منبر له لارې د سولې په راوستو کې د علماوو د رول په اړه هر اړخیزې خبرې وکړې.
دغه راز ښاغلي حلیمي علماوو ته سپارښتنه وکړه، چې د روژې مبارکې میاشتې په اوږدو کې ولسونو ته د منبر له لارې په هېواد کې د ملي یووالي، ورورولي، د سولې لپاره د ولس د هڅولو، د روژې مبارکې میاشتې د فضیلت، په روژې میاشت کې د فقیرانو او یتیمانو د لاسنیوي او مرستې په اړه ارشادي لارښوونې وکړي.
د پروګرام په پای کې د هرات ولایت مرستیال والي خبرې او د ارشاد، حج او اوقافو وزیر او ورسره پلاوي ته یې د ښه راغلاست تر څنګ د وزارت د رهبري د کاري برنامو، فعالیتونو او لاسته راوړنو مننه او قدردانی وکړ.
