د افغانستان علماوو په "افغانستان کې د سولې اعلان" له کنفرانس څخه ملاتړ اعلان کړ.
یکشنبه، ۱۲ چنګاښ ۱۴۰۰
په سعودي عربستان کې د رابطة العالم الاسلامي په مشرۍ افغانستان کې د سولې د ټینګښت په موخه د افغانستان او پاکستان د مخکښو دیني عالمانو د ګډ کنفرانس په ملاتړ د هېواد په ۱۷ ولایتونو: ننګرهار، کونړ، نورستان، لغمان، بلخ، دایکنډي، کندوز، جوزجان، بغلان، غور، هرات، پروان، پنجشېر، تخار، سمنګان، زابل او پکتیا ولایتونو کې غونډې وکړي.
په دي غونډو کې د ارشاد، حج او اوقافو وزارت اړوند رئیسانو، د یادو ولایتونو د علماوو شورا رئیسانو، د هېواد د زونونو د علماؤ شورا رئیسانو او ګڼ شمېر نورو دیني عالمانو ګډون کړی و.
د غونډې ویناوالو په سعودې عربستان کې د رابطة العالم الاسلامي په مشرۍ د جوړ شوي کنفرانس چې د غبرګولي میاشتې په ۲۰ مه نېټه د سعودي عربستان په مکې مکرمې ښار کې حرم شریف ته نږدې «په افغانستان کې د سولې اعلان» تر نامه لاندې چې د سعودي عربستان، پاکستان او افغانستان مشهورو علماء کرامو ګډون کړی و، د سولې په ارزښت او د بې ګناه مسلمانانو د وینو تویولو په حرمت خبرې وکړې او په افغانستان کې یې روانه جګړه ناروا وبلله.
دغو علماوو په د افغان سولې په برخه کې د سعودي عربستان د شاهي دولت له ملاتړ مننه وکړه او په یوه غږ سره یې د یاد کنفرانس د پرېکړه لیک څخه د کلک ملاتړ ترڅنګ د یاد پرېکړه لیک د بشپړ تطبیق غوښتنه هم وکړه. دغو دیني عالمانو وویل، چې له بهرنیو ځواکونو له وتلو وروسته د تاوتریخوالي د زیاتوالي لپاره هیڅ توجیه شتون نلري.
