د ارشاد، حج او اوقافو وزیر په کابل کې د ترکیې هیواد له شارژدافیر سره وکتل
سه شنبه، ۲۰ ذوالقعدة الحرام ۱۴۴۵هـ ق، مطابق: ۸ جوزا، ۱۴۰۳هـ ش
د ارشاد، حج او اوقافو وزیر شیخ الحدیث سرمحقق قضاوتپوه دکتور مفتي نورمحمد ثاقب په کابل کې د ترکیې هېواد له شارژدافیر ښاغلي جنک اونال او مل پلاوي سره په خپل کاري دفتر کې وکتل.
په دغه لیدنه کې د ترکیې هیواد شارژدافیر د اسلامي امارت د وروستیو پرمختګونو ترڅنګ د افغانستان او ترکیې ترمنځ د دیني او کلتوري اړیکو په اهمیت خبرې وکړې او ویې ویل: افغانان او ترکان د دین او مذهب په لحاظ یو دي، نوموړي د افغانستان اسلامي امارت او ترکیې هېواد د ښو او پراخو اړیکو په تړاو خوښي وښوده او د ګډو همکاریو په رامنځ ته کولو یې ټینګار وکړ.
نوموړي زیاته کړه: مونږ غواړو د خپل هېواد د دیني چارو ادارې (دیانت) له لارې د حج، جوماتونو او نورو دیني برخو په هکله ګډې دوامداره همکارۍ ولرو.
ورپسې د ارشاد، حج او اوقافو وزیر د ترکیې هیواد شارژدافیر ته د هرکلي ویلو ترڅنګ د نوموړي له ښو څرګندونو څخه خوښي وښوده
او په لنډه توګه یې د اسلامي امارت په لویو او عمده پرمختګونو رڼا واچوله او ترکیې هیواد ته یې د خپل وروستي سفر په هکله یادونه وکړه، چې د نړۍ د اسلامي هېوادونو د علماوو دغه مشورتي کنفرانس چې د یاد هېواد په تاریخي ښار استانبول کې جوړ شوی ؤ، خورا ارزښتمن ؤ او په ځانکړې توګه به د فلسطین د قضیې لپاره ډېری ګټوري پایلي ولری.
ښاغلي ثاقب د اسلامي هېوادونو تر منځ د داسې مهمو دیني او ارزښتناکو غونډو او کنفرانسونو جوړېدل خورا اړین او ضروري وبلل.
په دغه ناسته کې د نورو مهمو موضوعاتو ترڅنگ د دیني او علمي اړیکو په ټینګولو او پراختیا، د علماوو ترمنځ دیو لړ مهمو موضوعاتو په تړاو د نظریاتو په شریکولو بحث ترسره شو او ژمنه وشوه چې دواړه هېوادونه به په بیلا بیلو برخو کې خپلې همکارۍ لا زیاتې، پراخې اوجاري وساتي.
